ភ្នំពេញ៖ តំណាងសម្ដេចតេជោ នាយករដ្ឋមន្ត្រីកម្ពុជា លោកឧបនាយករដ្ឋមន្ត្រី ប្រាក់ សុខុន នឹងធ្វើការថ្លែងសុន្ទរកថាមួយនៅថ្ងៃស្អែកដើម្បីអបអរសាទរខួបលើកទី៣០ នៃការចុះហត្ថលេខាលើកិច្ចព្រមព្រៀងស្ដីពីដំណោះស្រាយនយោបាយរួមនៃជម្លោះកម្ពុជា ដែលហៅកាត់ថា កិច្ចព្រមព្រៀងសន្ដិភាពក្រុងប៉ារីស នាថ្ងៃទី២៣ ខែតុលា ឆ្នាំ២០២១ នៅវិមានសន្តិភាព រាជធានីភ្នំពេញ។

តាមសេចក្ដីប្រកាសព័ត៌មានចុះថ្ងៃទី២២ ខែតុលា ពិធីនេះនឹងមានការចូលរួមពីតំណាងស្ថាប័នព្រឹទ្ធសភា រដ្ឋសភា រាជរដ្ឋាភិបាល អង្គទូត និងការិយាល័យអង្គការសហប្រជាជាតិនៅរាជធានីភ្នំពេញ ជាពិសេសក៏មានការថ្លែងសុន្ទរកថាផ្ញើសារអបអរពីរដ្ឋមន្ត្រីកិច្ចការអឺរ៉ុបនិងការបរទេសបារាំង និងរដ្ឋមន្ត្រីការបរទេសឥណ្ឌូនេស៊ី ព្រមទាំងឯកអគ្គរាជទូតជប៉ុនតំណាងឱ្យស្ថានទូតទាំងអស់ប្រចាំកម្ពុជា។

សន្ធិសញ្ញាសន្តិភាពក្រុងប៉ារីសត្រូវបានបង្កើតឡើងនៅថ្ងៃទី២៣ ខែតុលា ឆ្នាំ១៩៩១ ដើម្បីបញ្ចប់សង្គ្រាមក្នុងប្រទេសកម្ពុជា នឹងអនុញ្ញាតឲ្យកងទ័ពអង្គការសហប្រជាជាតិចូលមកថែរក្សាសន្តិសុខ និងសន្តិភាពនៅក្នុងប្រទេស។ កិច្ចព្រមព្រៀងនេះមានប្រទេសជាហត្ថលេខីចំនួន១៩ ក្នុងនោះក៏មានប្រទេសមហាអំណាចទាំង៥ផងដែរ៕